علِّم طفلك

أ). الانتهاكات الجنسية للأطفال في بلاد برة منتشرة جدا جدا، وده غير عندنا في بلاد جوه، ولأننا في مجتمع متدين بطبعه فالانتهاكات الجنسية في حق الأطفال عندنا .. منتشرة جدااا جدااا جداااا، أطفال الأسرة و أطفال دور الرعاية وأطفال الشوارع و أيتها طفل .. كلهم معرضين لده للأسف.

ب). اللي بنشوفه في عياداتنا في طب نفس الأطفال والمراهقين بخصوص موضوع التحرش الجنسي لا يخطر على بالك … بجد لا يخطر على بالك.

ج). مهم جدا انك تعرف إن من ضمن الشخصيات التي تقوم بفعل الانتهاك هم ( العم، الخال، الجد، الأب ، صديق الأسرة ، الجار، المدرس الخاص، محفظ القرآن …) و دول أكتر بكتير من الحالات اللي بيكون الجاني فيها عم عبده البواب وعم فضل العامل اللي في المدرسة … أكيد مش كل دول خونة … لكن خلي بالك.
الدراسات بتقول ان أكتر من ٨٠% من حالات الاعتداء على الأطفال بتكون من أشخاص قريبين من الطفل (أقارب ومعارف) مش أغراب.

د). دي قائمة بحاجات لازم نعلمها لأطفالنا بدري على أد ما نقدر، بعضها ترجمته من مقال أجنبي.. مع بعض الإضافات … لأهميتها:

1- نبِّه على طفلتك الصغيرة ما تقعدش على حجر مخلوق حتى عمها
معلش مش بنخون أخوك … بس بنحتاط، وبنعوّد الطفل إن ده مش عادي

2- ما تخلعش هدومك قدام طفلك .. علمه إنك تستأذنه يخرج .. ويستأذنك تخرج

3- ما تسمحش لحد يقول لطفلك .. دي عروستي أو ده عريسي أو هنتجوز .. إلى آخر هذه السخافات الكوميدية اللطيفة 😤

4- لما طفلك يلعب مع أطفال تانيين خلى فيه طريقة متاحة دائما للإطمئنان على طريقة لعبهم … الأطفال أحيانا بيلعبوا ألعاب فيها انتهاكات جنسية – لعبة (عريس وعروسة) كأيقونة في الموضوع ده – خاصة لو المجموعة فيها حد كبير شوية

5- ما تضغطش على طفلك في زيارة حد هو مش بيستريح له.. وحاول تعرف ليه مش بيستريح له، كمان ركز لو طفلك متعلق بحد كبير بزيادة وعلى غير المألوف بتاعه، ونفكر كمان إيه كمية الحلويات اللي بيجيبها له عم صفوت دوناً عن باقي الأطفال. (ربما يطلع عم صفوت مجرد راجل طيب بيحب العيال، لكن ممكن يطلع راجل مش طيب “بيحب العيال”)

6- لما طفلك الحبوب اللي طول الوقت يلعب ويتنطط يبطل لعب وتنطيط فجأة ويبقى هادي ومنعزل يبقى انت محتاج تتكلم معاه كتير وبمنتهى الصبر.

7- علم طفلك الحقائق والقيم الصحيحة حوالين الجنس والأعضاء التناسلية بطريقة مناسبة للمرحلة العمرية ، لو ما عملتش كده المجتمع هيعلمه بطريقته.

8- اتفرج على أي فيلم كارتون انت جايبة لابنك قبل ما يشوفه، واتفرج معاه مرة كل فترة على طبيعة الحلقات اللي بيشوفها في التلفزيون.

9- اتأكد من حذف/حظر المواقع والقنوات التي تعرض مشاهد غير ملائمة من التلفزيون ويمكن وضع برامج للكمبيوتر لنفس الغرض.

– انصح أصدقائك بالفقرة رقم ٩ خاصة اللي ولادك بيروحوا عندهم

10- علم ولادك مبكراً قدر الإمكان ازاي يدخلوا الحمام ويغسلوا لنفسهم من غير مساعدة … وإنه ممنوع على أي حد كان .. يلمس الأجزاء دي – البنطلون لأ – لأن دي أجزاء لها خصوصية .. ولما يحتاجوا مساعدة يطلبوها من مين تحديدا، وازاي.

11- نعمل قائمة بالممنوعات اللي ممكن تهد اللي بنعمله .. الممنوعات دي ممكن تكون أفلام أو مسلسلات أو موسيقى معينة أو حتى أشخاص

12- لما طفلك يشتكي من شخص ما .. خد شكواه بمحمل الجد .. وحقق في القصة دي … مهما كانت الشكوى مش مقنعة بالنسبة لك
اهتم بالموضوع وحسسه إنك مصدقه، ووصل له إنك موجود دايما عشان تدافع عنه

13- علم ابنك الفرق بين السر والمفاجأة .. وان ما ينفعش حد يقوله سر و يطلب منه يخبيه على بابا أو ماما. وده غير انه يتفق مع ماما عشان يعمل لك مفاجأة.

14- علم ابنك الفرق بين اللمسة العادية بتاعة السلام واللمسة اللي مش عادية المريبة … فيه قصص مصورة وفيديوهات كتير ممكن تساعدك في ده
( زي فيلم “فيلم مهم جدا” ،

وزي فيلم “خلي بالك” ،

وزي أغنية فريق حماية “إوعى حد “، …)

15- امتى ابدأ أعلم طفلي الحاجات دي … ببساطة لما يبدأ يستوعب … وده مش عند سن 34 سنة زي ما البعض فاكر … الطفل يبدأ يستوعب ده من سن 3 سنين وقبل كده كمان، وتدرج معاه في الطريقة على قدر سنه.

16- صحيح الحاجات دي كتير شوية لكن خليك فاكر إن الألم والمعاناة اللي ممكن تنتج عن انتهاك جنسي لطفل ممكن تستمر معاه مدى الحياة .